Қазақстан «Жасанды интеллект саласындағы адам капиталын, кәсіпкерлік пен нарықтарды дамыту» (ALEM) жобасын жүзеге асыру үшін Дүниежүзілік банктен 11 999,7 млн жапон иенасы немесе 75 млн доллар көлемінде заем алады. Бұл бағдарлама жасанды интеллект бойынша мамандар даярлауға және 800 стартапқа қолдау көрсетуге бағытталған. Бұл туралы Дүниежүзілік банктің баспасөз қызметіне сілтеме жасап Kapital.kz іскерлік ақпарат орталығының тілшісі хабарлайды. «Қазақстан цифрлық экономиканы дамытуда айтарлықтай табысқа жетті, — деп атап өтті Дүниежүзілік банктің Қазақстан мен Түркіменстандағы тұрақты өкілі Андрей Михнев. — Жоба кәсіпкерлерді қолдау, жоғары білікті жұмыс орындарын ашу және елдің технологиялық секторына қосымша жеке инвестиция тарту арқылы осы әлеуетті еңбек өнімділігін арттыратын экономикалық өсімге айналдыруға ықпал етеді». ALEM жобасы Қазақстандағы ең келешегі бар компанияларды ұлғайту (кеңейту) үшін айрықша маңызы бар төрт бағыт бойынша жұмыс істеу арқылы 10 мың жұмыс орнын ашуға септігін тигізеді деп күтіледі: - мамандандырылған цифрлық кадрлардың ауқымды пулын қалыптастыру; - өнімділігі жоғары есептеу ресурстарына қолжетімділікті кеңейту; - робототехника саласындағы прототип жасау инфрақұрылымын нығайту; - өсу кезеңіндегі компаниялар үшін жыл сайын 20–25 млн доллар деп бағаланатын венчурлық капитал тапшылығын азайту. «Жоба жыл сайын 5 мыңнан астам тыңдаушыға жасанды интеллект негіздері, деректер тану (Data Science) мен машиналық оқыту саласында бір-бірін толықтыратын дағдыларды меңгеруге мүмкіндік береді. Бұл орайда қазіргі уақытта STEM-мамандықтар түлектерінің үштен бір бөлігін ғана құрайтын және венчурлық қаржы алған стартаптардың 6%-дан азын басқаратын әйелдерді тартуға ерекше көңіл бөлінеді. 2031 жылдың желтоқсанына қарай жоба 28 мың жасқа тереңдетілген даярлық бағдарламаларынан өтуге көмектесуді, бастапқыға дейінгі (pre-seed), бастапқы (seed) немесе жаһандық акселерациялық бағдарламалар шеңберінде 800 стартапқа қолдау көрсетуді, 50-ден астам компанияға венчурлық инвестиция тартуға ықпал етуді және кемінде 60 млн доллар жеке капитал жұмылдыруды көздейді», — делінген банктің хабарламасында. Жалпы соманың 20 млн доллары Alem Capital Management басқаруындағы арнайы «қорлар қорына» бағытталады. Сонымен қатар қазақстандық құрылтайшылардың шетелдік хабтарға және халықаралық нарықтарға шығуына көмектесетін акселерация бағдарламалары іске қосылады. Халықаралық қайта құру және даму банкі қаржыландыратын бұл жобаны Жасанды интеллект және цифрлық даму министрлігі Astana Hub және Alem Capital Management серіктестігімен бірге жүзеге асырады. Бағдарлама Дүниежүзілік банктің Қазақстандағы бұрынғы бастамаларының оң тәжірибесін жалғастырады. Бұған дейін «Өнімді инновацияларды ынталандыру» жобасы бойынша 162 стартап қолдау тауып, олар 23 млн доллардан астам инвестиция тартып, 2 мыңға жуық жұмыс орнын ашқан болатын. Дүниежүзілік банктің жақында жүргізген зерттеуіне сәйкес, Еуропа мен Орталық Азия өңірінде ЖИ негізіндегі бағдарламалық қамтамсыз етуді енгізетін компаниялардың өнімділігі орта есеппен 10–20%-ға жоғары. Қазақстанның ақпараттық-коммуникациялық технологиялар саласындағы экспорты 2019 жылғы 132 млн доллардан 2025 жылы 1,1 млрд долларға дейін өсті, бұл орайда 2030 жылға қарай 5 млрд долларға жеткізу мақсаты қойылған. Бұдан бұрын Дүниежүзілік банк Қазақстанға цифрландыру және ЖИ жөніндегі бағдарламада басымдықты серіктес болуды ұсынған еді. Сондай-ақ Қазақстан мен Дүниежүзілік банк экономикалық реформалар бойынша бірлескен іс-қимыл жоспарын әзірлейтіні хабарланған болатын.