Энергетика саласының цифрлық трансформациясы жекелеген технологиялық шешімдерден оларды кешенді қолдануға көшуді көздейді. Энергетика министрлігі AI & Digital Bridge 2026 аясында энергетика саласын цифрлық трансформациялауға, оның тиімділігі мен сенімділігін арттыруға бағытталған технологиялық шешімдер кешенін таныстырды. Бірыңғай технологиялық тұжырымдама аясында өзара байланысты төрт бағыт біріктірілген: жасанды интеллектіні қолдана отырып энергетикалық нысанды жобалау, нақты уақыт режимінде басқару, деректерді беру арналарын кванттық қорғау және аса маңызды инфрақұрылымды ұшқышсыз ұшу аппараттарынан қорғауға арналған шешімдер. Мұндай тәсіл энергетикалық нысанның өмірлік циклінің әртүрлі кезеңдерінде — жобалау мен жедел басқарудан бастап ақпараттық және физикалық қауіпсіздікті қамтамасыз етуге дейін — цифрлық технологияларды кешенді қолдану мүмкіндіктерін көрсетеді. Жасанды интеллектіні қолдана отырып жобалау бағытын PowerChina Chengdu компаниясы ұсынады. Жасанды интеллект құрылыс жұмыстары басталғанға дейін энергетикалық нысанның орналасу алаңы мен параметрлерін есептеу үшін қолданылады. Сондай-ақ осы бағыт аясында әл-Фараби атындағы ҚазҰУ-мен бірлескен R& D орталығын құру көзделуде. Rauda Technologies компаниясы Palanor платформасын пайдалана отырып, энергетикалық жүйені нақты уақыт режимінде мониторингтеу және басқару шешімдерін ұсынады. Жүйе ауытқуларды олар туындаған сәтте анықтауға және әрекет ету нұсқаларын қалыптастыруға мүмкіндік береді. Бұл ретте түпкілікті шешімді диспетчер қабылдайды. Жеке бағыт деректерді қорғауға арналған. Qubitera әл-Фараби атындағы ҚазҰУ жанындағы Қазақстан-Сингапур кванттық технологиялар орталығымен бірлесіп, энергетикалық нысандардың деректерді беру арналарын кванттық әдістермен қорғау жөніндегі пилоттық жобаны іске асыруда. Жоба перспективалық есептеу технологияларынан туындайтын ықтимал қауіптерді ескере отырып, аса маңызды деректерді беру арналарының қорғалу деңгейін арттыруға бағытталған. Dominor Partners шешімдері аса маңызды инфрақұрылымды ұшқышсыз ұшу аппараттарынан қорғауға бағытталған. Энергетикалық нысанның айналасында ықтимал қауіптерді анықтау, тану және оларға ден қою контуры қалыптастырылады. Бұл ретте әрекет ету тәсілі туралы шешімді оператор қабылдайды. Сонымен қатар Энергетика министрлігі KMG.AIAN бастамасын таныстырады. Ол мұнай өнімдері айналымының төрт буынын — өндіруді, тасымалдауды, өңдеуді және өткізуді — елдің бірыңғай отын балансына біріктіруді көздейді. Мұндай тәсіл жекелеген өңірлерде тапшылық туындауының ықтимал тәуекелдерін алдын ала анықтауға және басқарушылық шешімдер қабылдау кезінде деректерді тиімді пайдалануға мүмкіндік береді. Энергетика саласының цифрлық трансформациясы жекелеген технологиялық шешімдерден оларды кешенді қолдануға көшуді көздейді. Жасанды интеллект, заманауи басқару жүйелері және деректерді қорғаудың жаңа құралдары инфрақұрылымның сенімділігін арттыруға және қабылданатын шешімдердің тиімділігін күшейтуге ықпал етуі тиіс. Ұсынылған жобалар осындай технологиялардың практикалық мүмкіндіктерін көрсетуге және оларды энергетика саласында одан әрі қолдану перспективаларын бағалауға мүмкіндік береді». Энергетика министрлігі заманауи цифрлық шешімдерді енгізу, деректерді талдау және жасанды интеллект құралдарын дамыту, сондай-ақ отын-энергетика кешенінің технологиялық орнықтылығын нығайту бағытындағы жүйелі жұмысты жалғастырады.