Қасым-Жомарт Тоқаев General Atlantic компаниясының төрағасы және бас атқарушы директоры Уильям Фордты қабылдады. Әңгімелесу барысында инвестициялық ынтымақтастықтың келешегі, Қазақстандағы технологиялық сектор мен жасанды интеллект экожүйесін дамыту мәселелері талқыланды. Қасым-Жомарт Тоқаев жасанды интеллект пен цифрлық трансформация ел дамуының негізгі басымдықтары қатарында екенін атап өтті. Осы орайда жаңа жобаларды жүзеге асыруға әлемнің жетекші инвесторлары мен технологиялық компанияларын тартудың маңыздылығы атап өтілді. Президент Astana Hub, Alem.ai халықаралық жасанды интеллект орталығы мен Qazaq AI зерттеу университетін біріктіретін Қазақстанда технологиялық экожүйені қалыптастыру туралы айтты. Мемлекет басшысының айтуынша, бұл экожүйені дамыту әлемдік нарықта бәсекеге қабілетті технологиялық компаниялардың, соның ішінде Хиггсфилд AI-дың пайда болуына ықпал етеді. Өз кезегінде Уильям Форд Қасым-Жомарт Тоқаевты General Atlantic компаниясының финтех, электронды коммерция, бағдарламалық қамтамасыз ету және жасанды интеллект, сондай-ақ энергетика және цифрлық инфрақұрылым салаларындағы қарқынды дамып келе жатқан компанияларға инвестициялық мүмкіндіктері туралы хабардар етті. Әңгімелесушілер Екібастұзда жасанды интеллект, бұлтты есептеулер және цифрлық сервистер үшін үлкен инфрақұрылымдық платформа құруға бағытталған «Дата орталықтары алқабы» жобасын жүзеге асыруға ерекше назар аударды. Қазіргі уақытта General Atlantic осы жобаға қатысуға ерекше қызығушылық танытып отыр.