Гонконгта өткен ABU Robocon 2026 халықаралық робототехника чемпионатында Қазақстанның атынан қатысқан BULAN Nazarbayev University командасы Mabuchi Motor Award сыйлығын жеңіп алды. Жарысқа 21 елден университет командалары қатысты, деп хабарлайды ҚазАқпарат Ғылым және жоғары білім министрлігіне сілтеме жасап. Mabuchi Motor Award түпнұсқа инженерияны, механикалық дизайн сапасын және механикалық, электронды және бағдарламалық құрамдастардың тиімді интеграциясын мойындайды. ABU Robocon 2026 жарысына қатысу Қазақстанның жеті жылдық үзілістен кейін халықаралық чемпионатқа қайта оралуын көрсетті. Биылғы жылы ұлттық іріктеу мен ел құрамасын жасақтауды USTEM қоры ұйымдастырды. 1 шілдеде Almaty Tech Cup турнирі аясында республикалық кезең өтті. Нәтижесінде Гонконгта өтетін халықаралық финалда Қазақстан атынан шығу құқығына ие болған Назарбаев Университетінің BULAN командасы жеңімпаз атанды. Қазақстандық команда құрамында механика, электроника, бағдарламалау, дизайн және жобаларды басқару сияқты әртүрлі мамандықтардан 28 студент болды. Бұл пәнаралық тәсіл роботтық шешімдерді әзірлеу мен дайындауда инженерлік және цифрлық құзыреттерді біріктіруге мүмкіндік берді.
Халықаралық деңгейде Қазақстан атынан Мейіржан Таздарбай, Темірлан Амангелді, Аймедет Тауфик, Фаршед Иброхимов және Дастан Мүсірепов қатысты. Mabuchi Motor Award сыйлығын шағын электр қозғалтқыштарын өндіруші жапондық Mabuchi Motor компаниясы құрды. Сыйлық дизайнға өзіндік көзқарасты, машина жасаудың жоғары деңгейін және технологиялық шешімдерді жан-жақты қолдануды көрсететін командаларға беріледі. ABU Robocon 2026 қазақстандық командасының нәтижесі студенттік инженерия мен робототехниканың өсіп келе жатқан әлеуетін, сондай-ақ қазақстандық жас әзірлеушілердің халықаралық платформадағы бәсекеге қабілеттілігін көрсетеді, деп атап өтті департамент. Бұған дейін хабарлағанымыздай, қазақстандық жас роботшылар халықаралық чемпионатта 23 жүлдені жеңіп алды.
