Digital Qazaqstan: жаңа цифрлық жобалар экономикалық әсеріне қарай қаржыландырылады

Цифрландыруға қатысты жаңа бюджеттік өтінімдер тек жобаның Digital Qazaqstan стратегиясына сәйкестігімен шектелмей, оның күтілетін экономикалық әсері ескеріле отырып қаралады. Премьер-министр Олжас Бектенов цифрлық жобаларды бір жүйеге келтіріп, қайталанатын шешімдерге жұмсалатын шығындарды қысқартуды тапсырды, деп хабарлайды Tech-news. Үкімет отырысында Digital Qazaqstan стратегиясын мемлекеттік жоспарлау жүйесімен байланыстыру мәселесі қаралды. Бектеновтің айтуынша, стратегия жеке цифрлық бастамалар жиынтығына айналмай, мемлекеттік органдар мен өңірлердің нақты даму жоспарларына енгізілуі керек. Жасанды интеллект министрлігіне Стратегиялық жоспарлау агенттігімен бірлесіп, жыл соңына дейін стратегияның нысаналы көрсеткіштерін мемлекеттік органдардың, өңірлердің және квазимемлекеттік сектор ұйымдарының даму жоспарларына енгізу тапсырылды. Стратегияның нәтижесі іске қосылған цифрлық жобалардың санымен емес, белгіленген көрсеткіштердің қаншалықты орындалғанымен бағаланбақ. Яғни басты өлшем – қанша жоба жасалғаны емес, олардың нақты нәтиже беруі. Бұдан бөлек, мемлекеттік органдардың қолданыстағы және жоспарланған цифрлық жобалары қайта қаралады. Жасанды интеллект министрлігіне екі ай ішінде бір-бірінің функциясын қайталайтын шешімдерді анықтап, оларды бірыңғай архитектура мен ортақ мемлекеттік платформаларға шоғырландыру тапсырылды. Бұл бірнеше ведомствоның ұқсас функцияларды жеке-жеке әзірлеп, оған бюджет бөлуінің алдын алуға тиіс. Бектенов цифрландыруға бөлінетін қаржы мен технологиялық ресурстарды басым жобаларға бағыттау қажет екенін атап өтті. Осыған байланысты Жасанды интеллект министрлігі Қаржы министрлігімен бірге жыл соңына дейін цифрлық жобалардың басымдықтарын айқындауы керек. «Стратегияның көрсеткіштеріне қол жеткізуге тікелей ықпал ететін шешімдерді бірінші кезекте қаржыландыру қажет. Цифрландыруға қатысты барлық жаңа бюджеттік өтінімдер Digital Qazaqstan архитектурасы мен басымдықтарына сәйкестігі, сондай-ақ күтілетін экономикалық әсері тұрғысынан қаралуы тиіс», – деді Олжас Бектенов. Стратегияның әр бағыты бойынша нақты жобалар, көрсеткіштер, іске асыру мерзімдері және жауапты орындаушылар белгіленген. Түпкілікті нәтижеге қол жеткізуге мемлекеттік органдардың бірінші басшылары тікелей жауап береді. Стратегияның жалпы орындалуын бақылау және үйлестіру Премьер-министрдің орынбасары – жасанды интеллект және цифрлық даму министрі Жаслан Мәдиевке жүктелді. Сообщение Digital Qazaqstan: жаңа цифрлық жобалар экономикалық әсеріне қарай қаржыландырылады появились сначала на Tech news.