OpenAI киберқауіпсіздікке арналған GPT-6 Cyber моделін таныстырды

OpenAI кибершабуылдардың алдын алуға көмектесетін GPT-6 Cyber жасанды интеллект моделін ұсынды. Жаңа жүйе бағдарламалық жасақтамадағы осал тұстарды анықтап, олардың қауіптілік деңгейін бағалайды және әзірлеушілерге ақауларды түзетуге көмектеседі, деп хабарлайды Tech-news. Компанияның мәліметінше, GPT-6 Cyber — киберқауіпсіздік бағытында әзірленген ең қуатты моделі. Ол зерттеушілер белгілеген шектеулер аясында жұмыс істеп, анықталған мәселелер туралы нақты есеп беруге бейімделген. OpenAI мамандары жаңа модельді нақты бағдарламалық өнімдерде сынақтан өткізген. Зерттеу барысында GPT-6 Cyber Firefox браузерінен бұрын белгісіз болған қауіптілігі жоғары 81 осалдықты тапқан. Қазір Mozilla анықталған ақауларды түзету жұмыстарын жүргізіп жатыр. Ал Linux операциялық жүйесінің ядросын тексеру кезінде модель 1 724 осалдықты қайта жаңғыртып, олардың 948-іне жұмыс істейтін эксплойт жасай алған. Эксплойт — бағдарламалық жүйедегі осалдықты пайдаланып, оған рұқсатсыз әрекет жасауға мүмкіндік беретін код. Бұл көрсеткіш алдыңғы GPT-5.6 Sol моделінің нәтижесінен бес еседен астам жоғары. Салыстырмалы жағдайда оның көмегімен 166 осалдық қана іске асырылған. GPT-6 Cyber ExploitGym сынағында 48,5% нәтиже жинады. Бұл тест жасанды интеллектінің белгілі бір осалдықты пайдаланып, жүйеге шабуыл жасау мүмкіндігін бағалайды. Ал алдыңғы GPT-5.6 Cyber моделінің көрсеткіші 32,1% болған. Жаңа модель өнеркәсіптік жүйелердің қауіпсіздігін тексеруде де қолданылды. Өнеркәсіптік инфрақұрылымды қорғаумен айналысатын Dragos компаниясы оны электр станциясының жұмысын имитациялайтын зертханалық ортада сынаған. Нәтижесінде GPT-6 Cyber релелік қорғаныс жүйелеріндегі деректерді басқаруға арналған инженерлік бағдарламалық жасақтамадан бұрын анықталмаған екі осалдықты тапты. Қазіргі уақытта GPT-6 Cyber моделін Mozilla, Palo Alto Networks, Cisco және Calif компанияларының киберқауіпсіздік мамандары пайдаланып жатыр. OpenAI жаңа жүйеге әзірге шектеулі қолжетімділік ашқан. Модель API және Codex арқылы компанияның Daybreak Red сенімді қолжетімділік бағдарламасына мақұлданған мамандарға ұсынылады. Алдағы апталарда OpenAI GPT-6 Cyber моделін осы бағдарламаға қатысушылардың барлығына кезең-кезеңімен қолжетімді етуді жоспарлап отыр. Жаңа модельдің пайда болуы киберқауіпсіздіктегі жасанды интеллектінің рөлін кеңейте түседі. Енді AI тек шабуылдарды анықтауға ғана емес, бағдарламалық жүйелердегі әлсіз тұстарды алдын ала тауып, оларды түзетуге де көмектесе алады. Сообщение OpenAI киберқауіпсіздікке арналған GPT-6 Cyber моделін таныстырды появились сначала на Tech news.