Huawei 2027 жылы жасанды интеллектке арналған екі жаңа чипін таныстырады. Қытайлық технологиялық алпауыт есептеу қуатын арттырып, Nvidia-мен бәсекесін күшейтуді көздеп отыр, деп хабарлайды Tech-news. Компанияның кезекті чиптері 2027 жылдың бірінші және үшінші тоқсанында нарыққа шығады. Бұл туралы Huawei-дің ауыспалы төрағасы Дэвид Ван Шанхайдағы іс-шарада мәлімдеді. Компанияның жоспарына сәйкес, Ascend 960DT чипі 2027 жылдың бірінші тоқсанында, ал Ascend 960PR үшінші тоқсанда таныстырылады. Huawei сонымен қатар көптеген AI чиптерін бір жүйеге біріктіретін технологияларды дамытуға басымдық беріп отыр. Себебі қазіргі жасанды интеллект модельдері мен есептеу жүйелеріне бір ғана чиптің қуаты жеткіліксіз болуы мүмкін. Компания бұл бағытта UnifiedBus технологиясын қолданады. Ол бірнеше чиптің ақпарат алмасуын жылдамдатып, олардың біртұтас есептеу жүйесі ретінде жұмыс істеуіне мүмкіндік береді. Дэвид Ванның айтуынша, Huawei UnifiedBus негізінде ірі AI жүйелеріне арналған 11 чип әзірлеген. Компания мұндай шешімдерді «суперкластерлер» деп атайды. Ең ірі жүйелер бір миллионға дейін AI процессорын біріктіре алады. Huawei сонымен қатар 370-тен астам клиентке 1000-нан көп шағын есептеу жүйесін жеткізген. Олар «суперузелдер» деп аталады. Суперузел — көптеген AI чиптерін бір жүйеге біріктіріп, ортақ есептеу тапсырмаларын орындауға арналған құрылым. Алайда Huawei бір суперузелге қанша чип қосылатынын, клиенттерінің кім екенін және жеткізілімдердің нақты бөлінісін жарияламады. АҚШ пен Қытай жасанды интеллект инфрақұрылымын дамытуда бәсекелесіп отыр. Бұл жарысқа чиптер, деректер орталықтары және AI бағдарламалық жасақтамасы кіреді. АҚШ-тың экспорттық шектеулері Қытайдың кейбір озық есептеу чиптері мен жартылай өткізгіш өндірісі технологияларына қолжетімділігін шектеді. Соның аясында жергілікті технологиялық компаниялар отандық шешімдерді дамытуға көбірек көңіл бөлуде. Мұндай жағдайда бірнеше жергілікті чипті бір жүйеге біріктіру маңызды артықшылық бере алады. Бірақ бұл тәсілдің тиімділігі чиптердің бір-бірімен қаншалықты жылдам ақпарат алмасатынына байланысты. Huawei осы нарықта Nvidia-мен бәсекеге түсіп отыр. Америкалық компанияның аппараттық құралдары мен бағдарламалық жасақтамасы әлемдегі көптеген AI әзірлеушілері арасында кең қолданылады. Huawei үшін тек чиптің өнімділігі емес, оны пайдаланатын әзірлеушілер экожүйесі де маңызды. Дэвид Ван компанияның AI чиптері экожүйесінде ай сайын белсенді 5270 әзірлеуші бар екенін айтты. Сообщение Huawei 2027 жылы AI чиптерінің екі жаңа буынын шығарады появились сначала на Tech news.