9–10 қазанда Астанада өткен People&Projects Forum: Biomimetic & Management халықаралық форумында мемлекеттік басқаруды цифрландыру, жобаларды бақылауға жасанды интеллектіні енгізу және мемлекеттік органдардың жұмысын автоматтандыру мәселелері талқыланды. Форумда Қазақстандағы жобалық басқарудың цифрлық жүйесін мемлекеттік ақпараттық жүйелермен біріктіру тәжірибесі де таныстырылды, деп хабарлайды Tech-news. Форумды ҚР Жасанды интеллект және цифрлық даму министрлігі Astana IT University және People&Projects консалтингтік агенттігімен бірлесіп ұйымдастырды. Іс-шараға мемлекеттік органдардың, бизнес өкілдерінің, халықаралық ұйымдар мен академиялық ортаның мамандары қатысты. Форумның алғашқы күні басқару жүйелерінде табиғи үдерістердің қағидаттарын қолдануға арналды. Сарапшылар тірі жүйелерге тән бейімделу, өзара әрекеттесу, ресурстарды тиімді бөлу және тұрақтылықты сақтау тәсілдерін ұйымдар мен жобаларды басқаруда пайдалану жолдарын қарастырды. Сонымен қатар коммуникацияны жақсарту, жүйелі ойлау және тәуекелдерді басқару мәселелері талқыланды. 9 қазандағы бағдарламаға Анна Штайнцайг, Анар Есенгелдина, Ильяс Адильханов, Василь Галимов, Михаил Плотников, Сергей Колов, Каергелди Махамбетов, Карлығаш Сыдыкова, Зарина Биюмбаева және Петр Немой қатысты. Сондай-ақ жобалық басқаруды дамытуға үлес қосқан мамандар мен ұйымдар марапатталған People&Projects Awards рәсімі өтті. Форумның екінші күні жобалық басқаруды цифрлық құралдар арқылы жетілдіруге арналды. Қатысушылар жобалық офистердің жұмысын оңтайландыру, деректерді автоматты жинау, жобалардың орындалуын бақылау және жасанды интеллектіні басқарушылық шешімдер қабылдауда пайдалану мәселелерін талқылады. Форумда Қазақстандағы жобалық басқару жүйесін жетілдірудің бірнеше бағыты таныстырылды. Олардың қатарында нормативтік-құқықтық базаны жаңарту, жобалық іс-шараларды өзге процестерден ажырату және мемлекеттік органдардың әкімшілік жүктемесін азайту бар. Цифрландыру аясында жобалық басқару жүйесін бірнеше мемлекеттік ақпараттық жүйемен тестілік интеграциялау жүргізілген. Келесі кезеңде деректер алмасуды автоматтандыру және жобалардың орындалу барысын бақылауды жетілдіру жоспарланған. Жасанды интеллектіні қолдану арқылы көрсеткіштерді талдау, жоспардан ауытқуларды анықтау, ықтимал тәуекелдерді болжау және басқарушылық шешімдер қабылдауға көмектесетін құралдарды дамыту көзделіп отыр. Бұл есептерді қолмен дайындауға кететін жұмысты азайтып, жобалардың нәтижесін жедел бағалауға мүмкіндік береді. 10 қазанда Рашад Ибрагимов, Петр Немой, Дилара Абжанова, Салтанат Қозғанова, Абылайхан Қадыров, Мерей Нұрсұлтанов және Мираим Атанаева баяндама жасап, тәжірибелік мысалдар ұсынды. Форум аясында орталық мемлекеттік органдар мен өңірлердің жобалық офистері арасында тәжірибе алмасу сессиясы да ұйымдастырылды. Альтаир Ахметов, Тимур Джунельбаев, Динара Абдигалиева, Гүлпара Ташенова және Мөлдер Баймағанбетова жобаларды ұйымдастыру, командалар арасындағы үйлестіру және цифрлық шешімдерді пайдалану тәжірибесімен бөлісті. Қатысушылар жобалық басқарудағы мамандардың жаңа құзыреттерін дамытуға, цифрлық мониторинг жүйелерін енгізуге және стратегиялық құжаттардың орындалуын аналитикалық құралдар арқылы бағалауға назар аударды. Сондай-ақ мемлекеттік секторда, бизнесте және білім беру саласында PMI, IPMA, ISO және Prosci халықаралық стандарттары мен әдіснамаларын қолдану тәжірибесі қарастырылды. Іс-шара соңында жобалық басқаруды дамытуға және нақты нәтижелерге қол жеткізуге үлес қосқан орталық мемлекеттік органдар мен жергілікті атқарушы органдардың жобалық офистері ҚР Премьер-министрінің орынбасары – Жасанды интеллект және цифрлық даму министрі Жаслан Мәдиевтің алғыс хаттарымен марапатталды. Сообщение Астанада жобалық басқаруға ЖИ енгізу мәселелері талқыланды появились сначала на Tech news.